قرارات، مش لقطات شاشة

المشكلة

المواد والخطط والإعلانات كانت موزّعة على مجموعات واتساب متفرقة. كل فصل جديد كانت المعرفة تضيع وتبدأ الدفعة الجديدة من الصفر.

القرار

بنيتها كمنصة محتوى بسيطة بدل ما أبنيها كشبكة اجتماعية. الفريق كان بده تفاعل وتعليقات وملفات شخصية — رفضت، لأن المشكلة كانت التشتّت مش قلة التواصل. وكوني كنت مسؤول عن فريق من ٥ إلى ١٠ متطوعين، اخترت أبسط بنية ممكن أشرحها لمطوّر جديد بربع ساعة.

المشكلة

الكورسات بالفيديو صعب ترجع لنقطة معيّنة فيها. الطالب اللي عالق بمفهوم لازم يدوّر داخل ساعة تسجيل عشان يلاقي ٤٠ ثانية.

القرار

خليته شرائح قابلة للربط والرجوع بدل فيديو مستمر. الكلفة إنه ما في صوت ولا حضور شخصي — وهاد خسارة حقيقية بالتدريس. بس الربح إنه المحتوى صار قابل للفهرسة والرجوع، وهاي كانت المشكلة الأساسية.

المشكلة

حجز موعد بعيادة صغيرة بالأردن لسه بيصير بمكالمة، وبيفشل بأبسط الحالات: الموظفة مشغولة، أو العيادة مسكّرة، أو المريض بيتصل خارج الدوام.

القرار

صمّمت التدفّق بحيث المريض يقدر يحجز بدون ما يعمل حساب. كل خطوة تسجيل قبل الحجز بتخسّر ناس، والمريض اللي بده موعد مستعجل ما بده يعبّي نموذج. الحساب صار اختياري وبعد الحجز مش قبله.

المشكلة

الشركة كانت تدير كل شي على إكسل وواتساب. المعلومة موجودة بس ما حدا يعرف أي نسخة هي الصح.

القرار

اخترت Supabase بدل ما أبني خلفية كاملة من الصفر. مشروع منفرد بمدة أربعة أشهر ما بيتحمّل إني أكتب نظام صلاحيات ومصادقة بنفسي — الوقت لازم يروح على منطق الشغل اللي العميل بيدفع مقابله، مش على إعادة بناء أشياء محلولة.

المشكلة

النسخة الأولى كانت تطبيق صفحة واحدة بطيء بالتحميل الأول وغير مقروء لمحركات البحث.

القرار

أعدت البناء على Next.js بدل ما أرقّع الموجود. القرار كان مكلف بمنتصف مشروع تخرّج، بس التطبيق كان محتواه عام ولازم ينفهرس — وهاد شي ما بينحل بالترقيع.

المشكلة

منتج قائم عليه مستخدمون فعليون، والتعديل عليه لازم يصير بدون كسر شي شغّال.

القرار

بشتغل عليه بمبدأ إنه ما في تغيير كبير دفعة وحدة. الشغل على نظام حيّ عند غيرك غير الشغل على مشروعك — كل تعديل لازم يكون صغير كفاية إنه يترجع بسهولة.